Wikipedia:Normas d'estilo

Ista ye una plana que describe una norma d'estilo d'a Biquipedia. Despone d'un amplo consenso d'entre os usuarios, y per tanto, se'n considera una norma a seguir per toz os usuarios. D'antis no ne fez garra edición, miraz d'asegurar-tos que contaz con prou consenso emplegando-ne a pachina de descusión, a Tabierna u ubrindo una presa de decisión.

As normas d'estilo describen como redactar, organizar y dar formato a os articlos. L'obchetivo ye que os articlos de Biquipedia sean claros, precisos y consistents, pa que os lectores puedan entender-los y aproveitar-los millor.

Iste no mira d'estar un manual d'estilo a l'uso, sino una fuent pa resolver dubdas comunas sobre l'uso de l'idioma pa escribir articlos, d'alcuerdo con convencions alcordadas por usuarios d'a comunidat. Tampoco no ye un conchunto de regles fixos y inamovibles, ya que, seguindo o esprito colectivo d'a obra, istos regles son subchectos a debates y cambios.

Normas chenerals d'estilo

En redactar un articlo s'habrá de parar cuenta en bells consellos basicos que facilitarán tanto a elaboración como a lectura d'os articlos:

Normas de l'idioma aragonés

Se respetarán as normas de l'idioma aragonés contenidas en as obras academicas de referencia.

• Ortografía: se respetarán as normas ortograficas de l'idioma aragonés prescritas en a Ortografía de l'aragonés publicada por l'Academia Aragonesa d'a Luenga, asinas como l'uso correcto d'os signos ortograficos. Adicionalment a comunidat de Biquipedia ha fixau una solución concreta pa bels puntos que a norma grafica de l'Academia Aragonesa d'a Luenga deixa a elección de l'autor y que por coderencia d'a obra y especialment por problemas tecnicos que podrían derivar en duplicidaz. Ditos puntos, recullidos en a Ortografía consensuada de Biquipedia, serán d'aplicación obligatoria.

• Gramatica: se respetarán as normas gramaticals de l'idioma aragonés prescritas en obras de referencia como a Gramatica Basica de l'Aragonés publicada por o Estudio de Filología Aragonesa u atras como a Gramática de la lengua aragonesa de Francho Nagore Laín.

• Lexicolochía: se considerarán referents distintos diccionarios como o Diccionario ortografico de l'aragonés. Dada a diversidad lexicolochica d'as distintas variedaz de l'aragonés, se admitirá l'uso d'atras fuents expertas y especializadas en as diferents variants dialectals pa dilucidar y consensuar as posibles dubdas a o respecto.

En caso de que bella dubda no pueda resolver-se a traviés d'a consulta d'istas obras academicas, se establirá consenso con fuents de reconoixida autoridat sobre o tema. Pa resolver dubdas sobre l'uso de l'aragonés d'alcuerdo con as normas chenerals d'a lengua aragonesa, se puet visitar a pachina Wikipedia:Convencions idiomaticas y a pachina Wikipedia:Uso d'a luenga.

Cometas

As cometas dobles podrán usar-se en cualsiquiera d'as suyas variants graficas ("", “” u «»), siempre mantenindo a coderencia adintro d'un articlo, en os siguients casos:

1. Pa reproducir citas textuals: O musico anglés afirmó en una entrevista: «Dende chicorrón siempre m'ha feito goyo minchar chiretas». Sindembargo, ta citas textuals de mayor extensión cal emplegar a plantilla "Cita".
2. Pa advertir de l'uso incorrecto u ironico d'una palabra u si ye un extrancherismo u se'n fa un uso especial: O "sheriff" yera qui meteba lei en a ciudat; O ninón deciba que quereba prener o suyo "beberón".
3. Pa citar títols de poemas, articlos, obras d'arte, etc.: “S'ha feito de nueit” ye una canción prou popular en tot Aragón; Ixe poema fa parti d'a suya obra «No deixez morir a mía voz».
4. Cuan en o texto se quiere tractar una palabra en concreto: O termín "mocet" ya apareixeba en textos aragoneses medievals; L'uso d'a variant "gardaixina" ye muit estendillau en toda a zona oriental.

As cometas simples ('') s'emplegarán pa dar a traducción u definición d'una palabra u frase: En aragonés suflé, d'o francés "soufflé", significa literalment 'inflau'.

Cursiva

Por no existir uns regles especificos pa l'aragonés, l'uso de la cursiva se adapta de manera cheneral a l'uso descrito por a RAE:

• S'usa cursiva para estrancherismos, latinismos y, en cheneral, pa cualsiquier voz que no haiga estau adaptada a l'aragonés: «Manuel ascuitaba cancions de blues rock mientres feba footing».

Asinas mesmo, s'escriben en cursiva as sieglas d'exprisions en atros idiomas como R. S. V. P., QED u LOL.

• No se fa servir cursiva pa nombres propios (personas, empresas, puestos, etc.), encara sigan escritos en atros idiomas. Tampoco no s'escriben en cursiva as sieglas d'istos nombres.
• S'usa cursiva para os nombres cientificos en latín d'os taxons biolochicos chenero, especie y subspecie, por eiemplo: Felidae, Rana pyrenaica, Canis lupus familiaris. Manimenos, s'usará letra redonda pa as suyas formas aragonesas: abella, can. S'usa letra redonda pa toz os demás taxons superiors.
• S'usa cursiva pa os títols d'as obras de creyación, como álbums musicales, libros, publicacions periodicas, cintas, pinturas y series de televisión, entre atras (s'excluyen expresament os libros sagraus como l'Alcorán u a Biblia y as obras d'arquitectura y incheniería: edificios, puents, etc.). No s'escriben en cursiva os nombres u títols d'as partis d'una obra (poemas, cancions...) asinas como os títols de documentos oficials u historicos (tractaus, convencions, alcuerdos, declaracions, ...) u textos y documentos de caracter legal u churudico (fueros, codigos, órdens, leis, decretos, directivas...).

Igualment, s'han d'escribir en cursiva as sieglas que se corresponden a os títols d'istas obras de creyación: DLE, BOE, etc.

• Os pseudonimos, alias o embotadas que apareixcan inmediatament dimpués d'o nombre propio, deseparaus por comas, sin fer parti d'él, no s'escriben en cursiva: «Antonio Beltrán, o Esquinazau, estió un militar aragonés», y tampoco no cuan lo substituyen: «Os companyers d'o Esquinazau yeran d'o lugar»; u «Antonio Beltrán Casaña, mas conoixiu como o Esquinazau, estió un militar aragonés», estando a norma escribir-los en redonda.
  Manimenos, s'usa a cursiva (u as cometas), cuan a embotada substituye a o nombre u apareixe entre iste y l'apelliu: Che Guevara (o «Che» Guevara), o Pibe Valderrama (u o «Pibe» Valderrama), Ernesto Che Guevara (u Ernesto «Che» Guevara), Carlos o Pibe Valderrama (u Carlos o «Pibe» Valderrama).
• S'usa cursiva pa escribir simbolos de variables matematicas u de magnituz fisicas: «Einstein formuló a célebre ecuación E=mc²». Manimenos, s'escriben en redonda os signos matematicos como +, =, etc.; mesmo cuan se fican en un texto u ecuación en cursiva.

Numeros

Ordinals

Se veiga Wikipedia:Normas d'estilo/Ordinals con abreviadura

Os ordinals por un regular se fan servir abreviaus. Asinas, ye poco común escribir «milesimo ducentesimo cuadrachesimo uiteno»; en cuentas gosa escribir-se 1.248^eno. Un atra posibilidat ye emplegar como ordinals os numeros romanos, pero en iste caso no s'ha d'emplegar l'abreviadura volada.

Eixemplos:

• 1^ero, 1^er, 1^era
• 2^ndo, 2^nda
• 3^ero, 3^er, 3^era
• ...
• 10.000^eno, 10.000^ena
• «a XXIII edición d'o Festival de Sant Sabastián» u «a 23^ena edición d'o Festival de Sant Sabastián».