Oficinas de Asahi Shimbun Publishing Co. en Osaca, no Xapón.
O xornal autodenomínase ideoloxicamente como «liberal e de nova esquerda», en contraposición a outras correntes ideolóxicas expostas por competidores coma o Yomiuri Shimbun (centro-conservador), Sankei Shimbun (conservador de dereita) e Mainichi Shimbun (centro-esquerda tradicional). Porén, a esquerda tradicional xaponesa acusa frecuentemente ó diario de conservador, mentres que os conservadores acúsanno de ser de esquerda, ou mesmo é acusado de apoiar ó Partido Comunista do Xapón e ser comunista por sectores da dereita. O seu apoio ás posturas de acercamento coa China, fan que o xornal sexa considerado como «antiamericano e prochinés» pola prensa estadounidense, malia que o xornal critica frecuentemente ós réximes da China e Corea do Norte.
Pacifista dende o fin da segunda guerra mundial, a publicación conta con 3000 xornalistas, incluídos os correspondentes no estranxeiro.
O xornal ten unha alianza co diario International Herald Tribune e publica o International Herald Tribune/Asahi Shimbun como a súa versión en inglés que substituíu á anterior versión en inglés titulada Asahi Evening News. Ademais ten outra alianza co xornal oficial da República Popular da China 人民日报 (Rénmín Ribao, Diario do Pobo).
A columna Tensei Jingo (天声人語, «A voz divina é a linguaxe do pobo», en referencia á frase en latínVox Populi, Vox Dei, ‘voz o pobo, voz de Deus’) publícase diariamente dende 1904, tratando novas e temáticas sociais recentes. A columna tamén está dispoñíbel como boletín electrónico (newsletter).
Oficinas de Asahi Shimbun en Tsukiji, Chūō, Tokyo.
25 de xaneiro de 1879, publica a súa primeira edición en Osaka cunha tirada de 3000 exemplares.
1883, transfórmase no xornal de maior circulación de Xapón, con máis de 21000 exemplares diarios.
10 de xullo de 1888, compra o xornal de Tokyo Mezamashi Shimbun (めざまし新聞, Mezamashi shinbun) e expande a súa presenza a Tokyo lanzando o Asahi Shimbun de Tokyo (東京朝日新聞, Tōkyō asahi shinbun).
1889, cambia o nome da publicación en Osaka a Asahi Shimbun de Osaka (大阪朝日新聞, Ōsaka asahi shinbun)}.
1890, o Asahi Shimbun de Tokyo aumenta a súa capacidade de produción a 30000 exemplares. O 2 de novembro, o Asahi Shimbun de Osaka e o Asahi Shimbun de Tokyo son os primeiros en publicar a transcrición da declaración da nova constitución imperial.
1 de maio de 1904, publícase por primeira vez a columna Tensei Jingo (天声人語). O 30 de setembro imprime a súa primeira fotografía, das tropas xaponesas na fronte de batalla en China.
10 de xaneiro de 1908, fusiónanse corporativamente o Asahi Shimbun de Osaka e o Asahi Shimbun de Tokyo como sociedade de responsabilidade limitada Asahi Shimbun (朝日新聞合資会社, Asahi shinbun goshigaisha).
17 de novembro de 1911, Shigeko Takenaka (竹中繁子) transfórmase na primeira xornalista de sexo feminino no Asahi Shimbun.
Agosto de 1915, Comeza a publicación da edición vespertina do Asahi Shimbun de Osaka.
9 de xaneiro de 1923, as oficinas do Asahi Shimbun de Tokyo son destruídas polo Gran terremoto de Kantō. No mesmo ano publica a noticia falsa dunha rebelión coreana.
1924, excede o millón de exemplares diarios.
1929, en conmemoración das súas 50 anos crea o Premio Asahi.
25 de novembro de 1935, comeza a publicación do diario no oeste coas súas novas oficinas creadas en febreiro en Nagoya, cubrindo practicamente toda a península de Xapón coa súa publicación.
10 de abril de 1937, o avión do Asahi Shimbun «Vento divino» (神風, Kamikaze) establece a marca mundial dun voo entre o leste asiático e Europa cunha viaxe de 94 horas, 17 minutos e 56 segundos.
1 de setembro de 1940, unifícanse o nome das publicacións como o Asahi Shimbun.
1 de xaneiro de 1943, prohíbese a publicación do Asahi Shimbun logo da publicación dun ensaio de Seigo Nakano (中野正剛) crítico ao oficialismo.
5 de novembro de 1945, renuncia o presidente e todo o directorio como forma de aceptación das súas responsabilidades ao tergiversar os principios ideolóxicos do xornal durante a Segunda Guerra Mundial.
21 de novembro de 1947, o xornal adopta o novo sistema de kana (新仮名使い, shin kanazukai).
1 de outubro de 1951, renóvase a publicación en formato matutino e vespertino abandonada previamente.
1950, publica unha entrevista exclusiva co líder do Partido Comunista de Xapón Takashi Ito (伊藤律, Itō Takashi) que até o momento estaba incógnito. Máis tarde revélase que foi unha fabricación do xornalista.
1 de xaneiro de 1965, a edición de Ano Novo vende 5,31 millóns de exemplares, batendo a marca de 5 millóns por primeira vez en Xapón.
18 de novembro de 1979, o Asahi Shimbun organiza o primeira maratóninternacional feminina en Tokyo.
1980, traslada as súas oficinas de Tokyo de Chiyoda-ku (千代田区) a Chuo-ku (中央区, Chūō ku). Comeza a utilizar o sistema de edición de páxinas computarizado NELSON.
Maio de 1987, é vítima unha serie de ataques terroristas en Tokyo, Nagoya e Shizuoka. O «Escuadrón da vinganza vermella» (赤報隊, Sekihōtai) adxudícase a autoría dos ataques. O nome da agrupación fai referencia ao sangue, non ten relación co comunismo, e ten orixe nunha agrupación co mesmo nome da era Edo.
Xuño de 1988, finalizada a instalación do sistema NELSON nas oficinas de Osaka, o proceso de edición atópase 100% computarizado en todas as súas oficinas.
1996, traslada as súas oficinas do oeste do país desde Nagoya até Fukuoka.
Marzo do 2003, substitúe o "Suplemento do Domingo" publicado todas as semanas desde 1956 polo suplemento "be" (Business&Entertainment inglés, Negocios e Entretemento).
1 de abril do 2005, moderniza o seu sistema computarizado substituíndo ao antigo sistema NELSON.
3 de abril do 2005, renomea o suplemento do domingo de be a be on Sunday («negocios e entretemento do domingo») e publica o novo suplemento be on Saturday («negocios e entretemento do sábado»). Os nomes son un xogo de palabras en inglés con be (verbo ser).
