New York

New York
Drapeau de New York (fr)
Surnom (fr)	Big Apple d The City That Never Sleeps
Yettusemma ɣef	Jacques II d'Angleterre (fr)
Ansa
40°42′46″N 74°00′22″W
Awanek anayan	Iwunak Yeddukklen n Temrikt
État des États-Unis (fr)	New York
Tamanaɣt n	Iwunak Yeddukklen n Temrikt (1785–1790)
Imezdaɣ
Teɣṛed	8 804 190 (2020)
• Taneẓẓi n tɣerfa	7 255,98 imezdaɣen/km²
Azedduɣ	3 191 691 (2020)
Tutlayt tunṣibt	Taglizit
Tarakalt
Situé dans l'entité territoriale statistique (fr)	Grand New York (fr)
Tajumma	1 213,369839 km²
• Aman	35,3995 %
Tezga-d ɣef yiri	Hudson (fr) , East River (fr) , Bronx River (fr) , Harlem River (fr) , Long Island Sound (fr) , Agaraw Aṭlasi, Upper New York Bay (fr) d Lower New York Bay (fr)
Teflel	25 m
Isek yeflalen	Todt Hill (en)
Tilisa yakked	comté de Westchester (fr) comté d'Union (fr) comté de Hudson (fr) comté de Nassau (fr) comté de Bergen (fr)
Asefk amazray
Yezwar-it	La Nouvelle-Amsterdam (fr)
Asnulfu	1624 1626
Adyan asaru	Consolidation of New York City (en) (1 Yennayer 1898) 11 ctember 2001 (11 Ctember 2001)
Tuddsa tasertayt
Assemblée délibérante (fr)	conseil municipal de New York (fr)
• Maire de New York (fr)	Zohran Mamdani (mul) (1 Yennayer 2026)
Tadamsa
Produit intérieur brut nominal (fr)	886 000 000 000 $ (2021)
Amekzay uglim
Angal azarar	10000–10499, 11004–11005, 11100–11499 d 11600–11699
Domaine internet (fr)	.nyc.ny.us (en) , .new-york.ny.us (en) d .nyc (fr)
Plan de numérotation (fr)	212, 347, 646, 718, 917 d 929
Nniḍen
Tansa n web	nyc.gov…

New York d nettat ay d tamdint tameqqrant akk deg Yiwunak Yeddukklen. Tezga-d deg ugafa-agmuḍan n tmurt, ɣef Ugaraw Aṭlasi. Zedɣen-tt 8.336.697 n yimezdaɣen (19.006.798 s yegmamen ay d-yezzin fell-as). Tamdint-a tezga-d deg uwanak n New York.

Tamdint-a tettwassen s yixxamen-is ɣezzifen, s tnezzut, s tdamsa tameqqrant, s tẓuri, s tesdawiyin, s tmusni d umezruy-is amesbaɣur.

New York mačči d tamdint n tnezzut kan. D amkan anda mlalen yigduden seg waṭas n tmura, s tutlayin yemgaraden, s yidles yemgaraden d wallalen yemgaraden n tudert.

Ɣas akken tamdint-a tettwassen am yiwet n tɣerma tameqqrant n umaḍal amiran, amezruy-is yezga yeqqen ɣer yigduden inaṣliyen n Marikan n Ugafa...

Tamsalt i ilaq ad nseɣti deg tazwara: igduden inaṣliyen n New York d Lenape, seg yigduden inasliyen n Marikan n Ugafa. Amezruy n temdint yemmal-d amek i tettwabna ɣef wakal-nsen, syin akin amek i tuɣal d yiwet seg temdinin tigejdanin n umaḍal.

Tarakalt d ugama n New York

New York tezga deg umkan yesɛan azal ameqqran deg trakalt n Marikan. Tella gar yisaffen d yilellen, ayen i tt-yerran d tamdint n yinig d tnezzut seg zik.

Deg tama-s n umalu yella Asif Hudson, deg tama-s n usamar yella East River, i d aferdis n waman meẓẓiyen yeqqnen ɣer yilel. Deg unẓul, tella tagnit tameqqrant n waman i yettwassnen s yisem n New York Harbor, anda i d-keččmen yiseflinen.

Tarakalt-a tettak-as kraḍ n lfaydat:

• Yezmer ad yili deg-s unermis n tnezzut gar Marikan, Turuft d tmura nniḍen.
• Isaffen d yilellen ttaken-d iberdan n usiweḍ n yiferdisen d medden.
• Igelluyen n wakal d yigziren ttawin-d aṭas n temnaḍin i lebni n temdint.

Maca amkan-a yesɛa ula d uguren: iḥemmalen n waman, ahuzzu n yilel, leɣla n wakal d uguren n lebni deg temnaḍin i d-yettwarran zdat n waman.

Tiɣiwanin tisudisin

New York tebḍa ɣef semmus n tiɣiwanin timeqqranin (boroughs).

Manhattan

Manhattan.

D ul n tdamsa n temdint, anda llan Wall Street, Times Square, Central Park d waṭas n yixxamen ɣezzifen. D tamnaḍt yettwassnen aṭas deg umaḍal.

Brooklyn

Brooklyn

D tamnaḍt yesɛan agdud meqqren, tuddar tiqdimin, taẓuri, izerfan idelsanen d yimḍiqen imeqqranen n tudert n temdint.

Queens

Queens

Tettwassen s tmeslayin d yidles yemgaraden. Deg-s llan yimḍiqen n yinig, timnaḍin n tnezzut d waṭas n tdukliwin n yimezdaɣ.

The Bronx

Bronx.

D yiwet seg temnaḍin ideg d-yennulfa uɣanib aẓawan n hip-hop. Deg-s daɣen azrib ameqqran ɣer Bronx Zoo d Yankee Stadium.

Staten Island

Staten Island.

D tamnaḍt i yesɛan aṭas n yigran imenza, izerfan izegzawen d tuddar ur neččur ara d imezdaɣ am Manhattan.

3. Amezruy uqbel ad d-awḍen Yirupiyen

Uqbel ad d-awḍen Yirupiyen, akal n New York yella d aḥric seg wakal amenzu n Lenape, i d-yettwasemman Lenapehoking.

Igduden-a zedɣen deg temnaḍt-a i waṭas n yiseggasen s waṭas uqbel asnulfu n temdint tamirant.

Lenape sɛan tudert i d-yettwaznen ɣef ugama. Ttidiren s:

• Ugmar n yiɣersiwen.
• Uṣeggem n tiferkiwin d wakal n tfellaḥt.
• Uṣeyyeḍ n yiselman deg yisaffen.
• Tnezzut d wussawel gar tuddar d yigrawen yemgaraden.

Tudert-nsen tella teqqen ɣer tmettiwin n twaculin, taddart, tiɣawsiwin n ugama d tmenna n yimezwura.

Deg trakalt-nsen, Manhattan tettwassen s yisem yeqqnen ɣer Manahatta. Isem-a d yiwen seg yisemawen iqburen i d-yeggran deg temdint tamirant.

Aselmed n umezruy n New York ilaq ad yebdu s Lenape, acku ur tebdi ara tudert d tademsa n temnaḍt-a deg 1624.

4. Tallit n Hulanda — New Amsterdam (1624–1664)

Deg useggas 1609, amnadi Henry Hudson, i ixeddmen i tdukla n tnezzut tahulandit, yewweḍ ɣer temnaḍt n New York.

Hudson yella yettnadi abrid amaynut n tnezzut ɣer Asya, maca yeẓra azal n temnaḍt-a, ladɣa isaffen-is d waman i tt-id-yezgan.

Deg 1624, Ihulandiyen bdan ad d-sbedden imezdaɣ-nsen deg temnaḍt. Deg yiseggasen i d-iteddun, New Amsterdam tuɣal d tamdint tameẓẓyant n tnezzut ɣef yiri n Manhattan.

Deg 1653, tettwaɛqal s wudem unṣib am temdint.

New Amsterdam ur tettwasebded ara deg wakal ur nesɛi ara imezdaɣ, maca deg wakal i zedɣen yakan yigduden inasliyen Lenape. Yella d aḥric n tɣawsa tameqqrant n ikuluniyen Irupiyen,i yekksen kra n wakal i yigduden inasliyen Lenape, yerna i d-yessawḍen anagraw n useqdec n yimdanen i lfayda n wiyaḍ d tnezzut n waklan. ».

Tamdint tettnerni s:

• Tnezzut n yigelman n yiɣersiwen.
• Usiweḍ n yiferdisen ɣer Turuft.
• Lebni n yixxamen d lebni tqenṭyar n waman.
• Tnezzut gar tigdudin yemgaraden.

Deg tallit-a, tamdint tella d amkan n waṭas n tutlayin d yisɣanen. Llant temettiyin tihulandiyin, talmaniyin, tafransisin, tagliziyin, tiyahudiyin d yimezdaɣ iberkanen. tilelli n usɣan(n tedyanit) ur tettunefk ara i meṛṛa s yiwen wudem, yerna taklit d uɛzel n kra n yigrawen n yimezdaɣ d ayen yellan deg temdint.

5. Tallit n Lingliziyen (1664–1783)

Deg 1664, Lingliziyen ṭṭfen New Amsterdam. Beddlen-as isem, semman-as New York, ilmend n James, Duke of York.

Deg tallit-a, tamdint tettnerni s waṭas, tuɣal d yiwet seg temdinin tigejdanin n tmura i yellan ddaw udabu n Leglizi deg Marikan n Ugafa.

Tanezzut tettnerni, llan imezdaɣ imaynuten, ttemḍafaren-d yimseftiyen n tnezzut. Maca tadamsa n temdint tella tesɛa ula d aḥric i ibedden ɣef umahil n waklan.

Deg ṭṭrad n timunent n Marikan, New York teqqim ddaw n udabu aserdasi n Lingliziyen seg 1776 armi 1783.

Mi ifukk ṭṭrad, tamdint tebda tallit tamaynut, tuɣal d yiwet seg temdinin i yesɛan azal ameqqran deg usbeddi n uwanek amarikani.

6. New York deg tazwara n Uwanek Amarikani

Seg 1789 armi 1790, New York tella d tamdint tagejdant n Marikan (tamanaɣt tafidiralit).

Deg-s i yeṭṭef George Washington tanbaḍt-is tamezwarut am umenzu n tmurt deg 1789.

Ayen i d-yerr New York d tamdint tameqqrant n tnezzut deg lqern wis 19 mačči d tadamsa kan, maca d amkan-is:

• Asif n Hudson i d-yettɛawanen asirag ɣer daxel n tmurt.
• Asiweḍ n yiferdisen gar taddart d tmeddurt.
• Abrid n Erie Canal, i d-yeldin deg 1825.
• Tanezzut n Marikan s usiweḍ n waman.

Erie Canal yessuddes assaɣ n tnezzut gar New York d temnaḍin n wadda n Ilel Erie, ayen i yesnernan azal n temdint deg tedamsa n Marikan.

7. New York deg lqern wis 19 — tamdint n yinigen

aNew York deg 1900.

Deg lqern wis 19, New York tuɣal d yiwet seg temdinin i d-yettawin aṭas n yinigen seg Turuft. Imdanen n waṭas n tmura kecmen ɣer New York i wakken ad afen amahil, tilelli n usɣan neɣ tudert yelhan ugar.

Gar yinigen-a llan:

• Irlandiyen i d-iffɣen seg tazɣent n laẓ deg tmurt-nsen.
• Iṭalyanen i d-yusan seg waṭas n temnaḍin n Ṭelyan.
• Ilmaniyen d yinigen n Turuft Talemmast.
• Iyahudiyen i d-iffɣen seg Turuft n Usamar, ladɣa seg ussan n miḥyaf.

Deg 1892, tigzirt n Ellis Island tebda ad tesɛu tawuri tameqqrant deg usqerdec n yinigen i d-yekcemen ɣer Marikan.

New York tuɣal d tamdint n tutlayin yemgaraden, n yiɣaniben n tudert yemgaraden, d tnezzut i yettnernin.

Maca amhaz-a ur yelli ara war uguren. Imezdaɣ aṭas zedɣen deg yixxamen imecṭaḥ, gar-asen tella Maca aṭas n yimezdaɣ ttidiren deg tegnatin iweɛren: lehlakat, laẓ d tegnatin n umahil iwaɛren d uɛeddi ɣef yizerfan n yixeddamen.

Asbeddi n New York tamirant deg 1898

Deg 1 Yennayer 1898, tiɣiwanin i d-yettwasemman ass-a Manhattan, Brooklyn, Queens, Bronx d Staten Island dduklent deg yiwet n temdint tameqqrant.

Aneḍru-a yerr-a New York d yiwet seg temdinin timeqqranin n Marikan, s tmurt d ugdud meqqren aṭas.

8. Lqern wis 20 — tallit n lebni d tẓuri

New York deg 1900.

Deg tazwara n lqern wis 20, New York tebda ad tettbeddil s wudem ur nelli ara yakan.

Timdinin nniḍen n Marikan sɛant daɣen lebni ɣezzifen, maca New York tuɣal d yiwet seg temdinin i d-yettbanen s waṭas s yixxamen-is ɣezzifen, imahilen n tnezzut, tesdawiyin d tẓuri.

Deg 1904, aẓeṭṭa n umitru ddaw n wakal (subway) yeldi deg temdint. Anagraw-a yessizmir i waṭas n yimezdaɣ ad ddun gar temnaḍin yemgaraden.

Ixxamen ɣezzifen d lebni amaynut

D yiwen seg yixxamen yettwassnen s uɣanib n lebni Art déco.

Yettwabna deg tallit n tazɣent tadamsant tameqqrant, yuɣal d azamul n New York.

Deg 1929, tazɣent tadamsant tameqqrant tebda seld aɣelluy n tggazt n Wall Street. New York tuɣal d yiwet seg temdinin i yettwaḥuzzen s waṭas s twaɣit-a n tdamsa.

Maca seg yiseggasen n 1930 armi d taggara n ṭṭrad wis sin n umaḍal, tamdint tettnerni s lebni n yixxamen, iberdan d useggem n yizerfan n umahil.

9. New York d yidles amaḍlan

New York tesɛa azal ameqqran deg yidles n umaḍal.

Aẓawan: Harlem yuɣal d amḍiq yesɛan azal ameqqran deg umezruy n jazz. Deg Bronx, deg yiseggasen n 1970, d-yennulfa hip-hop, i d-yuɣalen d yiwen seg yiɣaniben n uẓawan yettwassnen aṭas.

Amezgun: Broadway d amkan yettwassnen s waṭas deg umaḍal s yimezguyen, ineccaden d tneḍruyin n tẓuri.

Taẓuri d tsekla: New York tesɛa timkerḍiwin, tiẓuriwin, tizeɣwa n sinima, isensayen n tẓuri d waṭas n yimukan n uselmed.

Tisdawiyin: Columbia University d New York University d snat seg tesdawiyin yettwassnen n temdint, i yesɛan tawuri deg unadi ussnan d uselmed.

10. New York deg tallit tamirant

Deg 11 Ctember 2001, New York teḥuza-tt twaɣit tameqqrant n tremaɣt, mi i d-yeɣli World Trade Center seld ineḍruyen n usekcem n isafagen yrttwaxḍfen deg yixxamen-a.

Ayen i d-yeḍran yesseḥzen tamdint d Marikan meṛṛa, yerna ibeddel kra n tsertiyin n tɣellist d tnezzut deg umaḍal.

Deg tallit i d-iteddun, tamdint tebna tikkelt nniḍen kra n yimḍiqen i yettwaḥuzzen, gar-asen One World Trade Center, i d-yuɣalen d azamul n usnerni amaynut n temdint.

Deg 2020, tazɣent n COVID-19 teḥuza New York s waṭas. Tamdint tesɛa aṭas n uguren deg tɣellist tazayezt, tadamsa d tudert n yal ass.

Ass-a, New York tezga gar temdinin tigejdanin n tdamsa tamaḍlant. Maca tesɛa daɣen uguren imeqqranen n tnezduɣt, asnerni n wazal n wakal d yixxamen, lḥif, leɣla n tudert d umgired adamsan gar yimezdaɣ.

Asebdad n tlelli(Statue of Liberty)

Asebdad n tlelli.

Azamul n tilelli, yettwasebded deg 1886. D asefk i d-tefka Fransa i Marikan, yuɣal d azamul n tlelli d yinigen i d-yettasen ɣer tmurt.

Asebdad-a yesɣawes-it Frédéric Auguste Bartholdi, ma d taɣessa-is tagensant tettwasɣawes s tallelt n Gustave Eiffel. Yesɛa azal n 93 n yimitren n tattayt seg lqaɛ n lsas-is armi d afella n taftilt.

Asebdad yeskanay-d tameṭṭut yettwaḥesben d azamul n tlelli. Teṭṭef taftilt deg ufus-is ayeffus, ma deg ufus-is azelmaḍ teṭṭef tawliḥt i ɣef yettwaru wass n timunent n Marikan, 4 Yulyu 1776. Ɣef uqerru-s tella tɛeṣṣabt s sa n yiɣallen n tafat, i d-yeskanayen tilelli i yettawin tafat ɣer umaḍal. Ɣer yiḍarren-is llan izḍawan yettwarẓan, i d-yeskanayen tilelli seg taklit d uḥebbes.

Deg umezruy-is, Asebdad n tlelli yuɣal d azamul n timunent, yizerfan n umdan d usirem. I waṭas n yinigen i d-yewwḍen ɣer New York s yiseflinen, ladɣa deg taggara n lqern wis 19 d tazwara n lqern wis 20, asebdad-a yella d yiwen seg yizumal imezwura i ttwalin mi ara d-kecmen ɣer Marikan.

Central Park

Afrag n Central Park.

Central Park d afrag agdudan ameqqran yezgan deg ul n Manhattan, deg temdint n New York. D yiwen seg yifragen yettwassnen aṭas deg umaḍal, acku yemmal-d amek i yezmer ugama ad yili deg tlemmast n temdint tameqqrant i yeččuren s yixxamen ɣezzifen, izenqan d yimezdaɣ. Deg-s llan yisekla, igran izegzawen, igelmimen n waman d yimukan n usgunfu, iberdan n teddin, tiqneṭyar, imukan n wurar d yisalayen n tẓuri.. Yezga gar yixxamen ɣezzifen n temdint. Afrag-a yesɛa tafesna n azal n 341 n hektaren (3,41 km²), s teɣzi n qrib 4 km.

Central Park yesɛa tawuri tagejdant deg tudert n yimezdaɣ n New York. Yettak-asen amkan i teddin s uḍar, tazzla, turart d usgunfu, yerna d amḍiq anda i zemren ad walin isekla, iɣersiwen d igelmimen deg tlemmast n temdint.

Afrag yesɛa daɣen azal deg tdelsa. Deg-s ttwaxedmen tceqqufin n umezgun, tmeɣriwin n uẓawan d waṭas n tneḍruyin tiguddanin. Aṭas n yifilmen d tsuddiwin n tilifizyun ttwasḍefren deg Central Park, ayen i t-yerran d yiwen seg yimukan yettwassnen deg sinima n Marikan.

Deg tefsut, isekla bdan ad d-ttfeǧǧiǧen; deg unebdu, igran izegzawen ččuren s yimdanen; deg umwan, iferrawen n yisekla ttbeddilen initen-nsen ɣer uwraɣ, azeggaɣ d uqehwi; ma deg tegrest, afrag yezmer ad yettwakcem s udfel.

Tiqenṭert n Brooklyn

Tiqenṭart n Brooklyn.

Tiqenṭert n Brooklyn (Brooklyn Bridge) d yiwet seg tqenṭyar timeqqranin yettwassnen aṭas deg New York, deg Yiwunak Yedduklen n Marikan. Teqqen gar Manhattan d Brooklyn, tettɛeddi ɣef East River. D yiwen seg yizumal igejdanen n temdint, acku tesɛa azal ameqqran deg umezruy n lebni, taknulujit d usiweḍ aɣerman.

Lebni n tqenṭert-a yebda deg 1870, ma d alday-is unṣib yella deg 24 Mayyu 1883, seld azal n 13 n yiseggasen n umahil. Asenfar-is yesɣawes-it umsinfer almani-amarikani John Augustus Roebling, maca yemmut uqbel ad yebdu lebni. Mmi-s, Washington Roebling, yekmel asenfar-a, s tallelt tameqqrant n tmeṭṭut-is Emily Warren Roebling, i yesɛan tawuri tagejdant deg uselḥu n umahil.

Tiqenṭert tesɛa teɣzi tamatut n azal n 1 825 n yimitren, ma d aḥric agejdan i d-yettɛeddin gar sin ifuluten yesɛa azal n 486 n yimitren. Deg tallit n alday-is, aḥric-a yella d win ɣezzifen akk gar tqenṭyar yettwasebḍen s yizḍawan deg umaḍal.

Taɣessa n tqenṭert tesɛa sin yifilunen imeqqranen n udɣaɣ, i ɣef bedden yizḍawan n wuzzal i yeṭṭfen abrid n tqenṭert, yesɛan talɣa n lebni n uɣanib agutik atrar(neogothique), akked yizḍawan n wuzzal i d-yettawin taẓayt n ubrid. Asemdukel n udɣaɣ d wuzzal yefka-as taɣessa iǧehden, yerna yerr-itt d yiwet seg tɣessiwin timeqqranin n lebni n lqern wis 19.

Lebni n tqenṭert ur yelli ara d amahil afessas. Ixxeddamen sbedden lsas-is deg lqaɛ n wasif, xedmen deg tegnatin iweɛren, yerna kra deg-sen mmuten neɣ ḥuzant-ten lehlakat i d-yettasen seg umahil ddaw n waman deg tɣessiwin medlent i yeččuren s waḍu ddaw n uẓẓay. Washington Roebling daɣen yehlek deg tallit n lebni, dɣa Emily Roebling tesɛa tawuri tameqqrant deg uselḥu n usenfar armi yemmed.

Deg tallit n ulday-is, Brooklyn d Manhattan llan d snat n temdinin yemgaraden. Tiqenṭert-a tessifses amussu n yimdanen d tnezzut gar-asent, yerna tesnerna assaɣen idamsanen d yinmettiyen. Mi d-duklent Brooklyn d New York deg 1898, tiqenṭert teqqim d yiwen seg yiberdan igejdanen n temdint tameqqrant.

Ass-a, Tiqenṭert n Brooklyn mazal tettwaseqdac i usiweḍ n tkarṛusin, amesni n tvawsiwin yimgaraden d yimdanen yetteddun ɣef uḍar. D amkan yettwassnen daɣen s tmeẓra-s ɣer Manhattan, East River d yixxamen ɣezzifen n New York.

S umezruy-is, taɣessa-s d cbaḥa n lebni-is, Tiqenṭert n Brooklyn tuɣal d azamul n tknulujit d umhaz aɣerman n lqern wis 19, yerna teqqim d yiwet seg tqenṭarin yettwassnen aṭas deg umaḍal.

Isunen n weɣrem n New York

Llan semmus (5) n yisunen deg New York, s tenglizt qqaren-as Boroughs.

5 Isunen n weɣrem n New York sɣur Julius Schorzman : 1- Manhattan, 2-Queens, 3-Brooklyn, 4-The Bronx, 5- Staten Island

• Manhattan : agwans n temdint, tella af tegzirt n Manhattan. Llant deg-s Wall Street, Tasdawit n New York, Tasdawit n Columbia, asutel n Yiwunak Yeddukklen (ONU/NU). Ɣur-es imezdaɣen 1 546 856 deg-s.
• The Bronx : ay d asun agellil akk deg weɣrem n New York akwd tdersiwin (minorités) tiberkanin d tispanikin maca tuɣal-d cwiṭ n teɣlist seg 20 iseggassen i yezrin. Ay d dduḥ n uẓawan Hip-Hop, deg-s illa Asarir Yankees Stadium. Ɣur-es 1 354 068 imezdaɣen deg-s.
• Queens : Ɣur-es 2 237 815 imezdaɣen deg-s. Yeḍra US Open dinna yal uggur n ctember, deg-s llan imafagen n JFK d La Guardia. Illa d agemim n tmezduɣt d tmugri (industry).
• Brooklyn : Agemim n tmezduɣt n New-Yorkers. Ɣur-es 2 488 194 imezdaɣen deg-s
• Staten Island : Ɣur-es imezdaɣen 491 730 deg-s. Daɣem d agemim n tmezduɣt n New-Yorkers, yuggug si Manhattan.