Fekk høyre at han dreiv med «jentesport» – nå skriv han norsk idrettshistorie

– Det er noko eg har trena på i 14 år nå. Og eg har alltid sagt til meg sjølv at det er noko eg vil gjere, fortel Daniil Valanov.

17-åringen frå Bergen har tatt store steg det siste året, og leverte eit historisk hopp under Junior Grand Prix i Georgia.

Valanov gjennomførte ein kvadrupel – trippel-kombinasjon, noko ingen norsk mann tidlegare har gjort i konkurranse.

Det er eit hopp som inneheld fire rotasjonar med ein gong etterfølgt av eit hopp med tre rotasjonar. Hoppet blir beskrive som eit av dei vanskelegaste i kunstløp.

– Eg har alltid sagt til meg sjølv at eg vil bli historisk, så det er kult å tenke på at eg er den første nordmannen til å gjere det, seier Valanov med eit smil om munnen.

Møtte fordommar

I Noreg er kunstløp ein kvinnedominert idrett, og det er uvanleg med gutar som satsar på eit internasjonalt toppnivå. Gjennom oppveksten har Valanov fått høyre negative kommentaren sporten sin.

– «Åh, det er jo jentesport. Du dansar på skøyter. Bla, bla, bla,». Eg høyrde slike ting veldig mykje på barneskulen og utover ungdomsskulen, fortel 17-åringen.

I starten innrømmer han at kommentarane gjekk inn på han.

– Eg tok det til hjarte før, når eg var yngre. Men etter tid så har eg blitt vand til det, folk får berre tenke det dei vil, seier han.

– Eg veit jo sjølv kva kunstløp inneber, og kva eg har putta inn av arbeid. Eg veit jo at det er jo ikkje ein «jentesport.» Eg veit kor krevjande og fysisk tung denne sporten er, fortset Valanov.

Vil ta ansvar som førebilde

Stortalentet ønsker nå å bruke sin eigen framgang til å bane veg for andre unge gutar.

Noreg slit med rekruttering av gutar i sporten, og Valanov meiner mangelen på mannlege førebilde er ein del av problemet.

– Det som Noreg har mangla, er eit mannleg førebilde i kunstløp. Det er det eg vil vere. Eg kjenner det er rolla mi, forklarer Valanov.

Han har eit klart råd til unge gutar som lurer på om dei skal starte på kunstløp, eller som allereie møter fordommar i miljøet sitt:

– Det beste du kan gjere er å ignorere kommentarane. Du må ikkje tenke på kva dei andre tenker, men heller gjere det for deg sjølv, oppfordrar han.

– Eg håpar jo verkeleg at gutar som held på med kunstløp, som synest det er ein «jenteidrett » og har lyst til å slutte, kan sjå opp til meg og bruke det som motivasjon. Eg vil vere eit førebilde for gutar, seier Valanov.

– Ein av dei tøffaste sportane

Sportssjef for kunstløp i Norges skøyteforbund, Regina Jensen, hyllar innsatsen til Valanov. Ho vil fjerne myten om at kunstløp berre er ein idrett for jenter.

Ho forklarer at om ein ser etter ein idrett som verkeleg byr på tøffheit, er kunstløp noko av det hardaste ein kan velje.

– Kunstløp er blant dei tøffaste sportane. Det krev styrke, rørsle, kondisjon og mental styrke først og fremst, slår ho fast.

Sportssjefen meiner dedikasjonen til 17-åringen er til stor inspirasjon.

– Han viser for alle i Noreg som held på med kunstløp, gutar og jenter, kva det er mogleg å få til med rett innstilling, rett målsetting og god planlegging.

Stige mot verdstoppen

Valanov tar i år steget opp frå junior til senior, og har som mål å delta i EM i januar og VM i mars. Dersom han kvalifiserer seg til EM, blir han den første mannlege utøvaren til å representere Noreg der sidan 2018.

Eit av dei store langsiktige måla er neste olympiske leikar i 2030.

NRKs kunstløp-kommentator Fredrik Island Gustavsen peikar på at kvadrupel-hopp i dag er eit absolutt krav for å hevde seg i verdstoppen for herrar.

– Kvadrupel-trippel-kombinasjonen er ikkje uvanleg internasjonalt, men her har vi kjernen, han markerer overgangen opp til toppsiktet i herrekunstløp. Utviklar Daniil seg vidare herfrå og får inn fleire kvadrupelhopp, kan han jo faktisk på sikt hevde seg heilt i verdstoppen, forklarer Gustavsen.

Valanov er klar i sin tale når han pratar om framtida.

– Eg håpar folk kan bruke meg som eit eksempel om 30 år, at eg har ein effekt på historia og at folk kjem til å hugse meg.

– Vi seier ikkje at vi prøver, vi skal, avsluttar Valanov.