Guhtta jagi dassái suopmelaš dánsu Sanna Hento millii iđii vilda jurdda. Son áiggošii dánsut čađa Suoma - Helssegis gitta Ohcejohkii.
Moadde jagi maŋŋelabbos jurdagis šattaige duohta plána ja son álggii plánet dánsunmátkki. Hento ráhkkanii dán mátkái guokte ja beallejagi ovdal go dasto mátki álggii.
Su badjel 1500 kilomehtera dánsunmátki álggii cuoŋománu loahpas Helssegis ja son ollii Ohcejohkii čakčamánu 6. beaivve. Dánsunbeaivvit sus ledje dán áigodagas oktiibuot 88.
Sanna Hento jáhkká, ahte son lea vuosttas olmmoš guhte dánssui čađa riika.
Dán jagi son ávvuda 30 jagi bistán dáiddárvuođa. Dánsut Suoma čađa oruige su mielas rivttes vuohki ávvudit dan.
– Dát lei nu jallas jurdda, ahte dán gal galggai dahkat, bohkosa Hento.
Ráhkkanii máŋgga jagi ovdal
Go mearrádus vuolgimis lei sihkkaraston, álggii guhkes ja systemáhtalaš ráhkkaneapmi.
Sanna Hento galggai hárjehit sávrivuođa, vai basttášii dánsut nu guhkes áigodaga. Son váccii, viegai, dagai guhkes dánsunhárjehusaid ja ja vanahalai joogain. Maiddái mielas galggai fuolahit.
Dál go son ollii Sápmái, sus eai leange ollenge bákčasat.
– Áibbas heahkastuvven, man bures gorut cevzzii dás, ii gal bávččas gokkoge, dadjá Hento.
Dánsunmátkki dihte galggai plánet sihke hárjehallama, muhto maiddái máđijaid, gokko bokte Sanna Hento dánsešii davás. Eandalitge Bohka ja Anára gaskasaš geaidnu bázii millii.
– In leat goassige ovdal leamašan doppe. Dat duovdagiid ávgadisvuohta báhcá gal agibeaivái millii.
Ieš dánsuma son galggai maid plánet bures, go stuorámus oassi mátkkis livččii asfáltageainnuid alde. Mátkki áigge son dánssui golmma iešguđetlágan dánsunvuogi: jive chassé, samba botafogo ja samba viehkanlávkkit doibme geahppasit garra geainnuid alde.
– Asfálta ii njalppe ollenge ja dieđusge miellit, rokkit ja mohkit váikkuhedje dánsumii, muitala Hento.
Hento dánssui maid máŋggalágan dálkkis: galbmasis, garra biekkas, arvvis ja goardi báhkkasis. Dušše stoarpma siste son ii dánson ollenge iežas dorvvolašvuođa dihte.
Hálidii buktit dánsunkultuvra olbmuid lahkosii
Dánsunprošeavtta ulbmilin lei sihke ávvudit Sanna Hento 30-jahkásaš dánsukarriera, ja maiddái buktit dánsuma teahterlávddiin olbmuid lusa.
Olbmot eai vuos nu beroštuvvan su dánsunmátkkis, muhto Oulu gávpogis ovddosguvlui su mátkkis šadde ain eanet positiivvalaš fuomášumi.
Hento doalai miehtá mátkki maid bargobajiid ja juohke beaivve gii nu bođii geaidnogurrii seavvit sutnje.
– Buot ahkásaš olbmot, unnoraččain gitta 90-jahkásažžii leat sádden dearvvuođaid, oassálastán bargobájiide ja movttiidahttán mu joatkit.
