Aanaar kuávlu historján piäsá tääl uápásmuđ veikkâ kävppimääđhi ääigi. Kieldâ lii ceggim ohtsis 18 historjátavlud Anarân já Avelân markkânij kuávdáid.
Tavlui koveh já teevstah läiđejeh keččeid kuávlu historján. Tiäđuh já koveh láá valdum Aanaar uđđâ historjákirjeest, mii almostui taan keesi.
Juurdâ kolbáid vuolgij Aanaar markkân aktiivlijn ulmuin, muštâl Anne-Marie Kalla Aanaar kieldâ viestâdem- já ohtsâštoimâhovdâ.
– Vuosmuš juurdâ lâi, et taah láá páihálij várás. Aanaarlij jieijâs historjá ličij kaskoo markkân uáinimnáál. Mut tiäđust-uv taat lii puohâi ilon, meid mađhâšeijei. Tondiet lii meid eŋgâlâskielâ fáárust.
Vuosmuu keččee kejâstuu faŋgij puáris kirkko
Tállán tavluii ceggim maŋa lâi vuosmuš keččee jo puáttám uápásmuđ Aanaar historján.
Espoost Anarân mađhâšâm Juha Ervola kiäsuttij enâmustáá kove Piälbáájäävri kirhoost.
– Vaarâ taat kiäsut muu tondiet, et muu madâräijih lâi kirkkohiärrá.
Puáris rakânâsah kiäsutteh suu ennuv. Sun muurâšt ko Aanaar markkân váldukiäinu piällást iä lah puáris rakânâsah ollágin.
Virgálâš historjátavlui lekkâmtilálâšvuotâ lii koskoho 30. peeivi čohčâmáánu sehe Avelist ete Anarist.
