Áŋŋellaš boazodoalli Keijo Pirttijärvi miella lea gehppon. Son diehtá, ahte ealus lea dál unnit guovžžat.
Dán čavčča leat deaivan bures Muotkeduoddara ja Báišduoddara guovlluin, go doppe leat goddán dán bivdobajis guhtta guovžža. Diibmá seamma guovllus godde njealje.
– Buorre go goddet daid guovžžaid, go dat leat lassánan. Iežaset guovžžaid lassin bohtet velá Norgga bealde guovžžat, muitala Pirttijärvi.
Pirttijärvi vuordá, ahte báhččojuvvon guovžžaid mearri álggášii oidnot maiddái miesseproseanttas, nappo galle miesi cevzet heakkas.
– Moatte jagi siste dat galggašii oidnogoahtit buoret miesseproseantan. Go han eai boađe ođđa guovžžat sadjái. Guovža dárbbaša viehka stuorra saji gos dat oroda. Doppe go báhčá ovtta de nubbi boahtá sadjái, árvaladdá Pirttijärvi.
Lea vejolaš, ahte guovžžat johtalit rájá rastá
Suoma luondduriggodatguovddáža emeritus-dutkanprofessor Ilpo Kojola ja dadjá, ahte dán ja ovddit jagiid bivdomearit dien guovlluin čujuhit dasa, ahte guovžžaid mearri lea laskan Suoma bealde Kárášjoga lahkosis. Lea vejolaš, ahte guovžžat johtalit rájá rastá.
– Go Anára guovllus geahččá dili, de Kárášjogas lea nannosut guovžanálli go gaskamearálaččat. Dušše Báhčaveaji guovllus leat Norgga dutkiid mielde eanet guovžžat, muitala Kojola.
Eandaliige varrisguovžžat johtet geasi áigge hui viiddis guovlluin.
DNA-iskosiid mielde Kárášjoga birrasis leat 16 sierra guovžža, muitaledje ođđajagimánus. Diibmá čogge Kárášjogas measta 250 guolgadukku main čielggai, ahte guovllus leat 7 varris- ja ovcci njiŋŋálasguovžža.
Eanemus guovžžat leat Kárášjoga máttaosiin.
Kárášjoga birrasis leat čoaggan guovžžaid guolgadukkuid jagi 2009 rájes vai ožžot diehtit man olu guovžžat leat doppe.
Bivdit leat buresboahtán bivdui
Pirttijärvi dieđuid mielde guovžžaid leat goddán máddin boahtán bivdit.
– Dakkárat geat barget dan guovžabivddu, buresboahtin deike, go han beatnagat leat dakkárat mat eai oagut bohccuid.
Pirttijärvi lohká, ahte son lea iešge goasnu cavgilan máddin boahtán bivdiide bivdobáikkiid.
– Ovddit jagiin lean muitalan bivdiide gokko sáhtášii leat guovža, dahje gos gánnehivčče fitnat guovlamin, muitala Pirttijärvi.
Guovžabivdu lea nohkan dál maiddái nuorttabeale boazodoalloguovllus. Mannan bearjadaga Anáris godde velá guokte guovžža. Nubbi dain goddui áibbas Ruošša rájá lahka ja nubbi Muotkkeduoddara guovllus.
Dán bivdobajis Ohcejogas godde oktiibuot golbma guovžža ja Anáris vihtta.
