遊戲開發者

一啲寫遊戲人

遊戲開發者，參見英文：Game dev，指製作電子遊戲軟件嘅企業、團體或者個人。舊時喺二十世紀嗰陣，遊戲軟件幾乎全部都係由團隊製作嘅，但係喺廿一世紀開始，由於遊戲引擎等技術嘅興起，開始有咗唔少由個人製作嘅獨立遊戲。

技能

二零一五年嘅宮本茂

内文：遊戲製作

睇埋：軟件工程同遊戲美工師

遊戲開發者喺技能上好多樣化，有啲專做編程等嘅數理工作，但做美術等創意性質嘅工作嘅人，對遊戲開發團隊嚟講都好重要。

遊戲編程係遊戲開發者最關鍵嘅技能之一。遊戲開發者需要熟悉最少一種常見嘅程式語言，並能夠用嚟實作遊戲邏輯功能。喺二十一世紀初當中，諸如 Python 、 C# 同埋 JS 等嘅程式語言都相當有用。

遊戲開發者通常都要識得用遊戲引擎：例如 Unity 、 Unreal 同 Godot 等嘅主流遊戲引擎都好重要，提供埋彩現、物理模擬、動畫系統同埋遊戲資產管理等嘅功能；遊戲開發者需要識得點樣喺引擎入便組織場景、設定物件、撰寫腳本，以及處理引擎本身嘅限制同版本差異。

數學同邏輯能力方面嘅能力亦有一定嘅重要性。遊戲程式裡便有好多系統：例如角色嘅移動、碰撞探測、 人工智能決策同埋程序生成等嘅系統，會牽涉到向量、矩陣、機率、幾何學同演算法。雖然遊戲開發者通常都唔洗識高深嘅數學，但明白呢啲嘢背後嘅原理，可以提升解難能力。

即使係冇咁偏向數理嘅人，都有大把機會參與遊戲開發。例如美術設計或者音樂方面嘅技術就好有用：遊戲開發者未必一定要自己親自畫概念圖、製作立體模型或者作曲，但佢哋通常都需要知道遊戲資產嘅製作原理，同埋點樣匯入同使用呢啲資產。遊戲開發團隊實會聘請識美術、作曲或者聲設計嘅人員。

喺細規模嘅 project 當中，上述咁多工作可能會一兩個人做晒。但喺較大嘅企業當中，製作遊戲通常係成大班人一齊做嘅，全個團隊可能有成幾百個人咁多。

分類

遊戲開發者可以按有冇同平台製作商成立特別協議嚟分類。

• 第一方開發者：俾遊戲機平台製作商收購咗嘅開發者，第一方開發者製作嘅遊戲，通常只會喺佢所屬嘅平台製作商出嘅遊戲機平台上賣。
• 第二方開發者：唔屬任何平台製作商，但同某啲平台製作商有特別協議，第二方開發者製作嘅遊戲，通常只會喺同佢協作嘅平台製作商出嘅遊戲機平台上賣。
• 第三方開發者：完全唔屬任何平台製作商嘅開發者，第三方開發者製作嘅遊戲可以喺任何遊戲機平台上賣。

睇埋

• 電子遊戲設計
• 電子遊戲詞彙：當中有好多詞彙，都係遊戲開發者必備嘅知識。

外拎

• （香港繁體）遊戲開發者喺香港真係只係傳說中嘅職業？，香港 01