互動設計

呢位用家喺度攞兩隻手指撳個熒幕，佢係咪想當個熒幕係輕觸式熒幕噉用？

互動設計，粵拼：wu6 dung6 cit3 gai3；英文簡寫：IxD ，有時寫 IXD，係設計領域中嘅分支，同用家體驗設計及工業設計有唔同程度嘅重叠。互動設計關注點主要在於人點樣同產品、系統或者服務有互動，亦致力思考點樣先可以設計出對用家嚟講易理解同使用嘅界面同操作流程，務求令到用家體驗盡可能咁好。互動設計可以用於軟件、網站同埋流動應用程式等嘅範疇，設計師要考慮使用者行為、需求、環境同技術限制，制定互動策略。

互動設計會借用多個領域嘅知識，包括心理學、人機互動、資訊架構等，務求令設計切合用家嘅需要同偏好。呢個過程包括要了解產品會喺咩情境下用、識別用家有乜嘢目標同行為，以及制定能夠回應用家需要同期望嘅設計方案。

基本目的

睇埋：終端用家同用家體驗

互動設計關注用家點樣同產品互動，以及呢啲互動點樣影響佢哋嘅整體體驗。設計師會考慮用家嘅期望同使用情境，設計出理想嘅互動方式。有關互動方式點至算係理想，設計師可以用以下唔同嘅概念衡量，譬如係

• 可用度：包括件產品幾易學、幾易用呀噉。
• 效率：包括用家用件產品完成工作所需時間同步驟數。
• 滿意度：包括用家對使用過程嘅主觀感受，例如係用起上嚟有幾愉快噉。

亦可以睇睇用家體驗嘅概念。

有工作者指出，軟件工程等嘅學科相當重視技術持份者嘅設計需要，而互動設計則較著重喺相關嘅技術或者商業限制之內，滿足用家嘅需要，同埋改良用家體驗。

五個維度

喺廿一世紀初，互動設計嘅思考可以從以下呢五個維度，5D，去理解：

• 字詞：用嚟傳達資訊嘅語言元素，可以包括掣上面嘅標籤、提示文字、導航連結等；喺維基百科，頁面頂部嘅編輯掣、討論連結，以及內部連結，例如主頁、分類等，都屬於呢個範疇。清晰、簡潔嘅字詞可以幫助用家快速理解功能，提升可用度。亦可以睇埋心理語言學上提及嘅可讀度概念。
• 視覺表示：包括用家介面中嘅圖像、圖示、排版、顏色等嘅元素；人類係相當依賴視覺嘅動物，設計得好嘅圖像同圖示能夠令用家一眼睇得明例如眼前咁多隻應用程式，每隻分別係做乜嘅。
• 物理對象：指用家同產品互動嗰時所使用嘅實體裝置，例如個人電腦、手機等；維基百科就分電腦版同手提版，用家喺唔同裝置上瀏覽維基百科，都會影響佢哋嘅互動方式同體驗。
• 時間：涉及用家介面中隨住時間變化嘅元素，例如動畫同音效等。
• 行為：牽涉到用家要做出咩行為嚟互動。

主要問題

設計師做互動設計嗰陣，成日會問以下呢啲問題：

• 用家可以點樣用踎士或者手指，喺介面上操作？
• 介面嘅外觀特徵，例如唔同物件嘅顏色、形狀、大細，呢啲特徵能唔能夠俾用家提示，令佢哋一睇就知點用？
• 有嘢出錯嗰陣，系統有冇講清楚發生咗咩事？有冇教用家點樣改正？
• 用家做完一個操作後，介面有冇俾返即時嘅反應，例如畫面更新、顯示提示等？噉就可以避免用家撳完掣後唔知發生咗咩事。
• 介面入面啲元素夠唔夠大，易撳、易操作？

相關領域

睇埋：用家體驗設計

工業設計

工業設計嘅核心原則同互動設計有相當嘅重疊。工業設計師會運用有關物件形狀、色彩、美學、人類知覺以及易用度等嘅知識，務求想令到物件配合使用佢嘅人。

人因工程

人因工程嘅某啲基本原則，為互動設計提供咗基礎，包括生物力學、運動學、生理學同心理學中嘅討論，講到人類喺建成環境入面嘅行為。

認知心理學

認知心理學嘅某啲基本原則，亦都為互動設計提供咗基礎，包括心靈模型、注意力、記憶等。

人機互動

人機互動嘅學術研究，包括一啲方法，可以用嚟描述同測試介面互動有幾易用嘅，譬如係認知走查法噉。

設計研究

互動設計師通常會透過反覆進行用家研究，為設計取得依據。用家研究用嚟識別終端用家有咩需要、動機同行為，而設計師做設計嗰陣，著重用家有乜嘢目標同體驗，並且按照設計嘅易用度同埋對情感嘅影響，評估設計。

歷史起源

互動設計呢個詞彙源自一九八〇年代中期，由錶·摩格理吉同錶·華彭克呢兩位專業嘅設計師提出，及後到咗九〇年代呢個概念開始得到廣泛接受。對於華彭克嚟講，呢個詞彙係將電腦科學嘅用家介面設計概念，套用成適用於工業設計專業嘅講法。

參見

• 電腦科學
• 資訊架構
• 用家介面
• 數據儀表板

文獻

歐美文獻：

• （英文）Soegaard, M. (2018). The basics of user experience design. Interaction Design Foundation，書名粵譯為用家體驗設計嘅基本，屬於入門書。佢哋第七章節就喺度講互動設計嘅基本概念。