El Canadá[24][25] ye un país de la fastera septentrional d'América del Norte. Les sos diez provincies y trés territorios estiéndense dende l'océanu Atlánticu al Pacíficu, y pel norte hasta l'océanu Glacial Árticu, y tienen una estensión de 9,98 millones de km², que convierten al Canadá nel segundu país más grande del mundu. La so frontera meridional colos Estaos Xuníos, amás, ye la frontera binacional más llarga del mundu. La mayoría del país tien un clima frío o mui frío n'iviernu, pero la fastera más meridional tien branos templaos. Canadá ta poco pobláu, y la mayoría'l so territoriu ta ocupáu por viesques y tundra, amás de pola cordelera de los Montes Rocosos. Ta perurbanizáu: el 82% de los sos 35,15 millones d'habitantes concéntrense en ciudaes de gran y medianu tamañu, les más d'elles cerca de la so frontera meridional. La so capital ye Ottawa, y les trés mayores aglomeraciones de población son les ciudaes de Toronto, Montreal y Vancouver.
Varies poblaciones indíxenes habitaron l'actual Canadá por miles d'años primero de qu'aportaran los europeos. Los primeros d'estos foron los británicos y franceses, qu'establecieron colonies dende'l sieglu XVI; la primera foi la colonia de Canadá, fundada por Francia en 1535. Como resultáu de dellos conflictos armaos, la Norteamérica británica ganó y perdió territorios hasta que, a finales del sieglu XVIII, controlaba la mayoría del actual territoriu canadianu. L'1 de xunetu de 1867 les colonies de Canadá, Nueva Brunswick y Nueva Escocia federáronse pa formar un dominiu federal semiautónomu que recibió'l nome de Canadá. De magar entamó un proceso d'adición de territorios y provincies al dominiu hasta llegar a los actuales. Canadá algamó la independencia gradualmente, nún procesu qu'entamó col nomáu gobiernu responsable na década de 1830 y que finó cola patriación de la Constitución en 1982. Sicasí, dende 1931, cola promulgación del Estatutu de Westminster, Canadá yera un país práuticamente independiente, una y bones l'únicu poder que nun tenía yera'l de poder enmendar la so propia constitución.
Canadá ye una democracia parllamentaria federal y una monarquía constitucional, cola reina Sabela II d'Inglaterra como xefa d'estáu. El país, que ye oficialmente billingüe a nivel federal, ye, como resultáu de la inmigración a gran escala de munchos otros países, una de les naciones más multiculturales y con mayor diversidá étnica del mundu. Su economía ye la décima mayor del mundu, y básase na esplotación de los sos bayurosos recursos naturales y de la so importante actividá comercial. La llarga y complexa rellación ente Canadá y el so vecín del sur, Estaos Xuníos, tuvo a lo llargo de tola so historia un impautu importante na so economía y cultura.
Percréese que los primeros habitantes d'América del Norte llegaron dende Siberia, alredor de 14.000 BP[26], al traviés de la ponte de Beringia. Los xacimientos arqueolóxicos paleoindios de Old Crow Fats y Bluefish Caves son dos de los restos más antiguos de la presencia humana nel Canadá[27]. Les carauterístiques de les sociedaes indíxenes inclúin la esistencia d'asentamientos premanentes con actividá agrícola, de sociedaes xerárquiques complexes y de redes de comerciu[28]. Delles d'estes cultures teníen desapaecío nel momentu de la llegada de los primeros esploradores europeos, a finales del sieglu XV y principios del XVI, y namái sabemos delles al traviés de les investigaciones arqueolóxiques[29]. Les poblaciones indíxenes presentes anguaño nel Canadá inclúin les Naciones Orixinaries del Canadá, los Inuit y los Métis[30]. Los caberos son d'orixe mistu. La so esistencia remóntase al sieglu XVII, cuando hebo matrimonios ente colonos europeos y pobladores de les Naciones Orixiinaries. Los descendientes d'esos casorios acabaron desarrollando una identidá propia[30].
Estímase que la población indíxena yera, nel momentu de producise los primeros asentamientos de colonos europeos, d'ente 200.000[31] y dos millones de persones[32]: la Comisión Real de los Pueblos Aboríxenes, creada pol gobiernu del país en 1991 pa investigar les rellaciones ente les poblaciones indíxenes del país, el so gobiernu y la so sociedá en conxuntu, aportó nel so informe de 1996 una cifra de 500.000 persones[33]. El volume d'habitantes aboríxenes menguó, de resultes de la colonización europea, ente un 40% y un 80%[34]. Esta mengua atribúise a varies causes: ente más otres, el contaxu d'enfermedaes europees pa las que la población nativa nun tenía inmunidá natural[35], los conflictos derivaos del comerciu de les pieles, los conflictos coles autoridaes coloniales y los propios colonos, y la perda de tierres a menes de los colonos, que provocó'l colapsu de delles naciones orixinaries[36].
Mapa de les reclamaciones territoriales n'América del Norte por parte de les diferentes potencies en 1750. Apaecen l'América Británica (en rosa), Nueva Francia (n'azul) y Nueva España (en naranxa)[37].
En xeneral, les primeres interaiciones ente los colonos d'orixe européu y les Naciones Orixinaries y los inuit foron relativamente pacífiques[38]. Neto les Naciones Orixinaries que los métis xugaron un papel fundamental nel desarrollu de les colonies europees nel Canadá, especialmente pola axuda que prestaron a los voyageurs y los coureurs des bois nes sos esploraciones del continente nos momentos cimeros del comerciu de pieles[39]. Esta rellación inicial, basada en trataos de paz y amistá, camudó dempués nuna política de desaposiamientu de les sos tierres, tamién per aciu de trataos[40]. De magar finales del sieglu XVIII, amás, los canadianos d'orixe européu forciaron a los indíxenes a asimilase na sociedá de corte occidental qu'anguaño tien el país[41]: el momentu cume d'esi procesu tuvo llugar a finales del sieglu XIX y principios del XX[42]. La situación entamó a camudar a primeros del XXI, cola formación, per parte del gobiernu, d'una comisión de reconciliación en 2008[43]. Ente les sos aiciones pueden citase'l reconocimientu del xenocidiu cultural[44], de los acuerdos d'asentamientu del sieglu XIX[43], de la discriminación racial y de la desaparición y asesinatos de muyeres indíxenes[45], en dellos casos acompañáu del pagu d'indemnizaciones.
El primer européu n'esplorar la costa oriental de Canadá parez tener sío l'esplorador viquinguLeif Erikson[46]. Alredor del añu 1000 los viquingos construyeron un pequeñu campamentu en L'Anse aux Meadows, nel estremu septentrional de Terranova, y ocupáronlu de forma non continuada demientres quiciás 20 años[47]. Nun habría más europeos nel actual Canadá hasta 1497, cuando John Cabot esploró y reclamó la costa atlántica de Canadá pal rei Enrique VII d'Inglaterra[48]. En 1534, l'esplorador francés Jacques Cartier esploró'l golfu de San Llorienzo. El 24 de xunetu llantó una cruz de 10 metros cola lleenda "llarga vida al rei de Francia", y tomó posesión del territoriu, que nomó Nueva Francia, en nome del rei Franciscu I[49]. Nos primeros años del sieglu XVI marineros europeos, vascos y portugueses, aprovecharon los avances nes téuniques de navegación pa establecer puestos de pesca na costa atlántica[50], qu'usaben de base pa la pesca estacional de ballenes. En xeneral, la ocupación de toos estos asentamientos tempranos parez tener sío de corta duración como resultáu de la dureza del clima y la dificultá de la navegación por la zona[51].
Los ingleses establecieron nuevos asentamientos en Terranova, alredor de 1610, al empar de los que fundaron más al sur, nes Trece Colonies[57]. La Norteamérica colonial sufrió cuatro guerres ente 1689 y 1763; les caberes correspuenden col desarrollu, en suelu norteamericanu, de la Guerra de los Siete Años[58]. La parte continental de Nueva Escocia pasó a manes de los británicos nel tratáu d'Utrecht (1713), y en 1763, tres finar la Guerra de los Siete Años, Canadá y la mayor parte de la Nueva Francia pasaron tamién a ser de soberanía británica[59].
El cuadru de Benjamin West The Death of General Wolfe (1771) representa la muerte de James Wolfe demientres la batalla de les llanaes d'Abraham, en Quebec[60].
La Proclamación Real de 1763 estableció los derechos de les naciones orixinaries, creó la provincia de Quebec a partir de lo que yera la Nueva Francia, y anesionó la islla del Cabu Bretón a Nueva Escocia[61]. La islla de San Xuan (anguaño Islla del Príncipe Dubardu) convirtiose nuna colonia estremada en 1769[62]. Pa evitar conflictos en Quebec el parllamentu británicu aprobó en 1774 la Llei de Quebec. Esta, amás d'espardir el territoriu de la provincia hacia los Grandes Llagos y el valle del ríu Ohio[63], garantizó-y la autonomía y derechos d'autoalministración nun contestu de creciente axitación de les Trece Colonies escontra'l dominiu británicu[64]. La llei restableció nel territoriu la llingua francesa, la fe católica y el derechu civil francés, lo que retardó'l crecimientu d'un posible movimientu independentista[65]. Nes Trece Colonies, en cambiu, la proclamación de la Llei de Quebec molestó enforma a munchos de los sos residentes, axudando a que medrara'l sentimientu antibritánicu nos años precedentes a la Revolución Americana[61].
El tratáu de París reconoció la independencia de los recién formaos Estaos Xuníos y estableció los términos de la paz: los territorios de la Norteamérica Británica asitiaos al sur de los Grandes Llagos y al este del ríu Mississippi foron cedíos al nuevu estáu.[66]. La guerra d'independencia d'Estaos Xuníos provocó tamién la migración d'un bon númeru de los nomaos lleales (loyalists), los colonos que llucharan escontra la independencia de les colonies. Munchos colaron pa Canadá: especialmente a la fastera atlántica, ú la so llegada camudó la distribución demográfica del territoriu. Nueva Brunswick, de resultes de la organización de los asentamientos de los lleales, dixebrose de Nueva Escocia, y la ciudá de Saint John convirtiose na primer ciudá del Canadá[67]. P'acomodar a los recién llegaos, de llingua inglesa, nel Canadá Central, la Llei Constitucional de 1791 dividió la provincia de Canadá nel Baxu Canadá (dempués Quebec), de llingua francesa, y l'Altu Canadá (dempués Ontario), de llingua inglesa, dándo-yos a cada una una asamblea llexislativa de so[68].
Los territorios canadianos foron l'escenariu de la Guerra de 1812, qu'enfrentó al Reinu Xuníu colos Estaos Xuníos. Esta finó en 1815, y nun provocó cambeos nes llendes ente los dos países[69]. La inmigración al país reanudose tras la guerra: llegaron dende les islles britániques más de 960.000 persones ente 1815 y 1850[70]. Esti númberu incluyía a refuxaos qu'escapaben de la Gran Fame Irlandesa, y escoceses de llingua gaélica espulsaos de les Tierres Altes d'Escocia[71]. Les enfermedaes infeccioses mataron ente'l 25% y el 33% de los europeos qu'emigraron a Canadá antes de 1891[31].
El deséu de contar con un sistema parllamentariu de gobiernu responsable foi la causa de les fallíes rebeliones de 1837-38[72]. El informe Durham, ellaboráu pol gobernador xeneral homónimu, unviáu pa esclariar les causes de les revueltes, recomendó la instauración del sistema de gobiernu responsable y l'asimilación de los francocanadianos na cultura inglesa[61]. L'Acta d'Unión de 1840 fundió toes les provincies preesistentes nuna única Provincia de Canadá, y estableció la creación de sistemes de gobiernu responsable pa toes les provincies de la Norteamérica Británica asitiaes al este del llagu Superior primero de 1855. La frma del Tratáu d'Oregón ente Gran Bretaña y los Estaos Xuníos, en 1846, resolvió la disputa sobre les llendes d'Oregón, y estendió la frontera occidental canadianu a lo llartu del paralelu 49. Esto abrió'l camín pa la creación de colonies britániques de la islla de Vancouver (1849) y Columbia Británica (1858). Anantes, en 1825, el tratáu de San Petersburgu, firmáu por Gran Bretaña y Rusia, estableciera la frontera ente ambos países a lo llargo la costa del Pacíficu. Sicasí, inclusu dempués de la compra d'Alaska por Estaos Xuníos en 1867, siguieron les disputes sobre la demarcación esacta de la llende ente Alaska y Yukón y ente Alaska y Columbia Británica[73].
Tres de cellebrase trés conferencies pa discutir la creación d'una constitución, la Llei Constitucional de 1867 proclamó oficialmente la Confederación Canadiana, formada por cuatro provincies (Ontario, Québec, Nueva Escocia y Nueva Brunswick) el 1 de xunetu de 1867[74]. Canadá asumió'l control de la Tierra de Rupert y el Territoriu Noroccidental pa formar los Territorios del Noroeste; les reivindicaciones de los métis prendieron la conocida como Rebelión del ríu Roxu, que desembocó na creación de la provincia de Manitoba en xunetu de 1870[75]. La Columbia Británica y la Islla de Vancouver, que foran convertíes nuna única colonia en 1866, xuniéronse a la confederación en 1871 cola promesa de que se fadría un ferrocarril trescontinental al territoriu nún plazu de diez años[76], y la islla del Príncipe Dubardu xuniose a la confederación en 1873[77]. En 1898, demientres la Fiebre del Oru de Klondike nos Territorios del Noroeste, el parllamentu creó'l Territoriu de Yukón. En 1905, finalmente, Alberta y Saskatchewan convirtiéronse en provincies[77].
Ente 1871 y 1896 casi un cuartu de la población canadiana emigró a los Estaos Xuníos[78]. Pa poblar l'oeste y atrayer inmigrantes europeos Canadá patrocinó la construcción de tres ferrocarriles trescontinentales, aprobó una llei pa favorecer l'asentamientu (Dominion Lands Act) y creó un cuerpu paramilitar, la Policía Montada del Noroeste, pa caltener l'orde nesa rexón[79]. Esti periodu d'espansión al oeste y de construcción nacional tuvo como consecuencia'l desplazamientu de les Naciones Orixinaries de les praeres canadianes: quitáronse-yos les tierres p'agospiar colonos europeos[80], y seríen treslladaos a reserves[81]. De resultes del procesu d'introducción de ganáu de lleche y carne y de cultivos cerealeros, estinguiose'l bisonte americanu de llanada (Bison bison bison) nel Canadá occidental[82]. Como esti yera la fonte principal d'alimentu de les Naciones Orixinaries, estes sofrieron fames y enfermedaes[83]; el gobiernu ofreció-yos sofitu d'emerxencia a condición de que aceutaran vivir en reserves[84]. Demientres esti tiempu, el país introdució tamién la Llei de Indios (Indian Act), qu'estendió'l control del estáu sobre les naciones orixinaries n'estayes como educación, gobiernu y derechos llegales[85].
El control de Gran Bretaña sobre los asuntos esteriores canadianos, acordies cola Llei Constitucional de 1867, tuvo como consecuencia que la declaración de guerra a Alemaña en 1914 supunxo la entrada de Canadá na Gran Guerra[86]. Los voluntarios unviaos al frente occidental acabaron formando parte del Canadian Corps, que tuvo una intervención destacada en delles batalles, como la de Vimy Ridge[87]. La propuesta del gobiernu unionista, en 1917, d'aumentar el menguante númberu de soldaos n'activu mediante un reclutamientu obligatoriu foi refugada polos canadianos de fala francesa, contrarios a cualisquier otra llealtá nacional que nun fora col Canadá y que protestaron enforma escontra'l reclutamientu[88]. Tres finar la guerra, en 1919,, Canadá xuniose a la Sociedá de Naciones independientemente del Reinu Xuníu[87]. Esti camín de dixebra continuó cola Declaración Balfour de 1926, qu'abrió'l procesu que finó cola consecución de la independencia del país al traviés del Estatutu de Westminster de 1931[89],
La Gran Depresión tuvo un impactu importante nel país[90], y en remupesta a elli un partíu políticu de corte socialdemócrata, la Federación Cooperativa de la Commonwealth (Co-operative Commonwealth Federation), desarrolló de magar mediaos de la década de 1940 y a lo llargo d'esa década y la siguiente na provincia de Saskatchewan, que gobernaba, una política empobinada a la creación d'un estáu del bientar[91]. Nesi mesmu tiempu, la declaración de guerra a Alemaña el 10 de setiembre de 1939, siete díes más tarde que'l Reinu Xuníu, señaló definitivamente el calter independiente del país[87].
Los primeros soldaos y canadianos aportaron a Gran Bretaña n'avientu de 1939. Pal final de la guerra, más d'un millón de canadianos teníen servío nes fuercies armaes del país[92]. Tuvieron un papel destacáu en bien de batalles del frente occidental: invasión d'Italia, desembarcu de Normandía, batalles de Normandía y Scheldt[87]... Canadá, amás, dio refuxu a la monarquía holandesa mientres que'l país tuvo ocupáu polos nazis[93]. Hubo, como na Primer Guerra Mundial, protestes en Quebec escontra'l reclutamientu, en 1944, pero el país, en xeneral, salió fortalecíu económicamente, y con un exércitu más poderosu, de la guerra[94].
La crisis financiera provocada pola Gran Depresión llevó al Dominiu de Newfoundland a renunciar al so autogobiernu en 1934, y a convertise nuna colonia de la Corona dirixida por un gobernador británicu[95]. Tres de dos referéndums, los sos habitantes votaron xunise a Canadá, en 1949, col rangu de provincia[96].
El crecimientu económicu del país tres de la Segunda Guerra Mundial, xunto coles polítiques de socesivos gobiernos lliberales, foron dando niciu a una identidá canadiana, marcada pola adopción de la bandera nacional en 1965[97], la implantación del billingüismu oficial (inglés ya francés) en 1969[98] y la institución del multiculturalismu oficial en 1971[99]. Implantáronse tamién programes sociales de calter socialdemócrata, como el Medicare (asistencia sanitaria) y planes nacionales de pensiones (Canada Pension Plan) y empréstamos a estudiantes (Canada Student Loans). Sicasí, dellos gobiernos provinciale, especialmente Québec y Alberta, opunxéronse a munches d'estes midíes por considerar qu'invadíen les sos competencies[100].
Finalmente, una serie de conferencies constitucionales dieron como frutu la Llei de Canadá de 1982 (Canada Act 1982) y la patriación de la constitución del país del Reinu Xuníu, col desarrollu paralelu d'una Carta Canadiana de los Derechos y Llibertaes[101]. Canadá, asina, algamó la soberanía completa como un país independiente, rexíu pola so propia monarquía[102]. En 1999 Nunavut convirtiose, tres d'una serie de negociaciones col gobiernu federal, nel tercer territoriu del país[103].
Al tiempu, na década de 1960, en Québec taben produciéndose fondos cambeos sociales y económicos nel contestu de la nomada Revolución Tranquila, de la que surdió un movimientu nacionalista[105]. El Frente de Lliberación de Québec (Front de libération du Québec, FLQ), con una campaña de secuestros y colocación de bombes en 1970, fizo españar la Crisis d'Ochobre[106]; y en 1976 el Partíu Quebequés (Parti Québécois), soberanista, algamó'l gobiernu de la provincia, magar que perdió un referéndum pro-independencia en 1980. Los intentos d'acomodar constitucionalmente al nacionalismu quebequés al traviés del alcuerdu del llagu Meech fracasaron en 1990[107], y esto provocó la formación del Bloque Quebequés (Bloc Québécois) en Québec y el Partíu Reformista de Canadá (Reform Party of Canada) nel oeste del país[108]. Un segundu referéndum, cellebráu en 1995, dio'l trunfu a los partidarios de siguir en Canadá por un marxe perestrechu (50,6%, frente al 49,4% partidariu de la secesión)[109]. En 1997, el Tribunal Supremu decretó que la secesión unilateral d'una provincia sedría inconstitucional, ya'l parllamentu aprobó una llei (Clarity Act) qu'afitaba los términos nos que podría producise una salida negociada de la Confederación[107].
Amás del problema del Québec, la sociedá canadiana foi sescudida, a finales de los años 80 y principios de los 90, por varies crisis: la esplosión del vuelu 182 d'Air India, en 1985, el mayor asesinatu masivu na historia del país[110]; la masacre de la École Polytechnique de 1989[111]; y la crisis d'Oka en 1990[112], el primeru d'una serie d'enfrentamientos violentos ente los gobiernos provinciales y los grupos indíxenes[113]. Canadá participó na Guerra del Golfu (1990), y tamién en delles operaciones de caltenimientu de la paz nos años posteriores. Asina, soldaos canadianos participaron nos Balcanes demientres y tres de les Guerres Yugoslaves[114], en Somalia[115] y en Afganistán[116].
En 2011, soldaos canadianos participaron na guerra civil de Libia[117] como parte de la intervención de la OTAN, y tamién combatieron al Estáu Islámicu en Iraq a mediaos d'esa misma década[118]. En 2020, el 27 de xineru, aportó al país la epidemia de COVID-19, que produció una importante disrupción política y económica[119]. En 2021 descubriéronse lo que podríen ser tumbes de neños indíxenes a la vera d'antiguos colexos, rescamplando les práutiques de xenocidiu cultural escontra los pueblos indíxenes desarrollaes nel pasáu[120]. El 1 de febreru de 2025 entamó una guerra comercial con Estaos Xuníos tres de la robla, pol presidente d'Estaos Xuníos Donald Trump, d'órdenes executives qu'imponíen aranceles a los bienes canadianos importaos al so país. Eses midíes acompañáronse de declaraciones que suxeríen l'anexón del Canadá y la so conversión nel 51u estáu de los Estaos Xuníos[121].
Canadá ye una federación compuesta por diez provincies y trés territorios. Les primeres tienen más autonomía que los segundos, faéndose cargu de la educación, la sanidá y el bienestar[123]. Ente toes recauden en conxuntu más impuestos que'l propiu gobiernu federal, lo que fai del sistema canadianu un modelu singular nel mundu. Col so presupuestu el gobiernu federal puede iniciar polítiques nacionales en provincies concretes, y magar que les provincies pueden renunciar a recibir esos fondos y programes, fánelo mui de ralo en ralo. El gobiernu federal, amás, tien un fondu p'aportar dineru a les provincies más probes col envís d'igualar na midida de lo posible la cantidá y calidá de los servicios que presten toes elles a los ciudadanos[124].
Mapa animáu amosando la medría y el cambeu de llendes de les provincies y territorios de Canadá de magar la formación de la confederación, en 1867[125].
La población del país ye, según el censu canadianu de 2016, de 35.151.728 habitantes, lo que representa un aumentu del 5% respectu al del 2011[126][127]. Ente 2011 y mayu del 2016 la población del país medró en 1,7 millones d'habitantes; dos terceres partes d'ellos yeren inmigrantes[128]. Ente 1990 y 2008 la población medró en 5,6 millones, que representen un 20,4% del total de la so población[129]. Los causantes d'esta medría son, en primer llugar, la inmigración, y tamién, magar qu'en menor midida, el crecimientu natural[130].
Canadá tien una de les mayores tases d'inmigración per capita del mundu[131], de resultes tantu d'una política económica consciente como de los efeutos de la reunificación familiar de los inmigrantes previamente asentaos nel país[132][133]. Sicasí, esto nun ye tan problemáticu como notros países: la población del país, y tamién tolos partíos políticos más importantes, sofiten l'actual política migratoria[132][134]. Un total de 341.180 persones aportaron al país en 2019, principalmente dende Asia[135]: India, Filipines y China son los trés países de los que proceden un mayor númberu d'inmigrantes a Canadá[136]. Los recién llegaos asiéntense principalmente nes mayores árees urbanes del país, les de Toronto, Montreal y Vancouver[137]. Canadá tamién acepta una gran cantidá de refuxaos: más del 10% de los refuxaos que son acoyíos notros países a nivel mundial sonlo en Canadá, que recibió a más de 28.000 d'ellos en 2018[138][139].
La densidá de población de Canadá, de 3,7 habitantes per km², ye una de les menores del mundu[140]. Canadá estiéndese latitudinalmente ente los paralelos 83 N y 41 N, y alredor del 95% de los sos habitantes viven al sur del paralelu 55 N[141]. Cuatru quintos de la so población, amás, viven a 150 km o menos de la llende del país colos Estaos Xuníos[142]. La fastera más densamente poblada del país ye'l Corredor Québec-Windsor: estiéndese pola fastera meridional de les provincies de Québec y Ontario a la vera de los Grandes Llagos y el ríu San Llorienzu, y nelli vive casi la metá de la población total del país[141]. Otru 30% vive na rexón de Lower Mainland, na Columbia Británica, y nel Corredor Calgary-Edmonton, na provincia d'Alberta[143].
Principales árees metropolitanes censales (CMA)del país (censu de 2016)
↑L'asturianu que vien. Observaciones y suxerencies sobre l'asturianu normativu y el so usu; Ramón d'Andrés, Publicaciones Ámbitu, S.L., Uviéu, 2008; ISBN: 978-84-96413-48-1.
↑Dillehay, Thomas D. (2008). The Settlement of the Americas: A New Prehistory, p. 61. Basic Books. ISBN 978-0-7867-2543-4.
Fagan, Brian M.; Durrani, Nadia (2016). World Prehistory: A Brief Introduction, p. 124. Routledge. ISBN 978-1-317-34244-1.
↑Hayes, Derek (2008). Canada: An Illustrated History, pp. 7 y 13. Douglas & Mcintyre. ISBN 978-1-55365-259-5.
Macklem, Patrick (2001). Indigenous Difference and the Constitution of Canada, p. 170. University of Toronto Press. ISBN 978-0-8020-4195-1.
↑Collen, Evelyn Jane; Johar, Angad Singh; Teixeira, João C.; Llamas, Bastien (August 5, 2022). "The immunogenetic impact of European colonization in the Americas". Frontiers in Genetics. 13 918227. Frontiers Media SA: 1–8. doi:10.3389/fgene.2022.918227. ISSN 1664-8021. PMC 9388791. PMID 35991555.
True Peters, Stephanie (2005). Smallpox in the New World, p. 39. Marshall Cavendish. ISBN 978-0-7614-1637-1
↑Laidlaw, Z.; Lester, Alan (2015). Indigenous Communities and Settler Colonialism: Land Holding, Loss and Survival in an Interconnected World, p. 150. Springer. ISBN 978-1-137-45236-8
Ray, Arthur J. (2005). I Have Lived Here Since The World Began, p. 244. Key Porter Books. ISBN 978-1-55263-633-6
↑Chapman, Frederick T. European Claims in North America in 1750. JSTOR community.15128627
↑Williams, L. (2021). Indigenous Intergenerational Resilience: Confronting Cultural and Ecological Crisis. Routledge Studies in Indigenous Peoples and Policy, p. 51. Taylor & Francis. ISBN 978-1-000-47233-2
Turner, N.J. (2020). Plants, People, and Places: The Roles of Ethnobotany and Ethnoecology in Indigenous Peoples' Land Rights in Canada and Beyond, p. 14. McGill-Queen's Indigenous and Northern Studies. McGill-Queen's University Press. ISBN 978-0-2280-0317-5
↑Commission de vérité et réconciliation du Canada (2016, 1 de xineru). Canada's Residential Schools: The History, Part 1, Origins to 1939: The Final Report of the Truth and Reconciliation Commission of Canada, Volume I, pp. 3-7. McGill-Queen's University Press. pp. 3–7. ISBN 978-0-7735-9818-8
Lux, M.K. (2016). Separate Beds: A History of Indian Hospitals in Canada, 1920s-1980s, p. 7. G - Reference, Information and Interdisciplinary Subjects Series. University of Toronto Press. ISBN 978-1-4426-1386-7
Kirmayer, Laurence J.; Guthrie, Gail Valaskakis (2009). Healing Traditions: The Mental Health of Aboriginal Peoples in Canada, p. 9. UBC Press. ISBN 978-0-7748-5863-2
↑Wallace, Biirgitta. (2018, 12 d'ochobre). "Leif Eriksson". The Canadian Encyclopedia. Consultáu'l 13 de febreru de 2026.
Johansen, Bruce E.; Pritzker, Barry M. (2007). Encyclopedia of American Indian History, pp. 727–728. ABC-CLIO. ISBN 978-1-85109-818-7
↑Cordell, Linda S.; Lightfoot, Kent; McManamon, Francis; Milner, George (2009). "L'Anse aux Meadows National Historic Site". Archaeology in America: An Encyclopedia, pp. 27, 82. ABC-CLIO. ISBN 978-0-313-02189-3
Cipolla, Craig N.; Crellin, Rachel J.; Harris, Oliver J. T. (December 4, 2023). Archaeology for Today and Tomorrow, p. 199. Taylor & Francis. ISBN 978-1-003-81978-3
↑Baten, Jörg (2016). A History of the Global Economy. From 1500 to the Present, p. 84. Cambridge University Press. ISBN 978-1-107-50718-0
Wynn, Graeme (2007). Canada and Arctic North America: An Environmental History, p. 49. ABC-CLIO. ISBN 978-1-85109-437-0
↑Buckner, Phillip Alfred; Reid, John G. (1994). The Atlantic Region to Confederation: A History, pp. 55–56. University of Toronto Press. ISBN 978-0-8020-6977-1
Hornsby, Stephen J (2005). British Atlantic, American frontier: spaces of power in early modern British America, pp. 14, 18–19, 22–23. University Press of New England. ISBN 978-1-58465-427-8
↑«From 'Nouvelle-France' to 'Francophonie canadienne': a historical survey».International Journal of the Sociology of Language(185): páxs.25–52. May 2007. doi:10.1515/IJSL.2007.024. ISSN0165-2516.
↑Dijkink, Gertjan; Knippenberg, Hans (2001). The Territorial Factor: Political Geography in a Globalising World. Amsterdam University Press. p. 226. ISBN 978-9-0562-9188-4.
Bothwell, Robert (1996). History of Canada Since 1867. Michigan State University Press. pp. 31, 207–310. ISBN 978-0-8701-3399-2.
↑«Basic Income and the Canadian Welfare State: Exploring the Realms of Possibility».Basic Income Studies3(1). July 11, 2008. doi:10.2202/1932-0183.1084.
↑«Official language minorities in Canada: an introduction».International Journal of the Sociology of Language(185): páxs.1–9. May 2007. doi:10.1515/IJSL.2007.022.
↑«Canada's Experiment with Aboriginal Self-Determination in Nunavut: From Vision to Illusion».International Journal on Minority and Group Rights15(2–3): páxs.335–367. 2008. doi:10.1163/157181108X332659.
↑Leblanc, Daniel (13 d'agostu de 2010). "A brief history of the Bloc Québécois". The Globe and Mail.
Betz, Hans-Georg; Immerfall, Stefan (1998). The New Politics of the Right: Neo-Populist Parties and Movements in Established Democracies. St. Martin's Press. p. 173. ISBN 978-0-3122-1134-9
↑R MacGregor; Dawson, WF(1989) Norman Ward: Democratic Government in Canada(n'inglés).Toronto:University of Toronto Press,páx. 16–17, 59–60, 66. ISBN 0802067034.
↑Doern, G.B., Maslove, A.M., Prince, M.J., Canadian Public Budgeting in the Age of Crises: Shifting Budgetary Domains and Temporal Budgeting, p. 1. MQUP, 2013. ISBN 978-0-7735-8853-0
_-_CAN_-_UNOCHA.svg)
.svg)
.jpg)
Wikimedia Commons tien conteníu multimedia tocante a Canadá.
